85. Kitab oxumaqla özünü bir şey zənn etmək niyə pis deyil?
Kitab oxumaq insanın yalnız bilik əldə etməsinə yox, həm də nitq qabiliyyətinin, üslubunun və məntiqli düşünmə bacarığının inkişafına kömək edir. Bu, insanın özünü ifadə etməsini, başqaları ilə fikirlərini aydın və inandırıcı şəkildə bölüşməsini gücləndirir.

1. Ədəbi ifadələri genişləndirir
Kitab oxuyan insanın söz ehtiyatı artır, fikirlərini daha axıcı və təsirli ifadə edə bilir. Danışığında sıradan sözlər əvəzinə daha rəngarəng ifadələr işlədir.

Misal:
Əgər əvvəl "Mən kədərləndim" deyirdinsə, oxuduğun kitablardan sonra bunu "Qəlbimdə bir sıxıntı hiss etdim, sanki payız yarpağı kimi solğunlaşdım" şəklində ifadə edə bilərsən.

Sözlüyün özündən bir misal:
Bir çox yazar vardı ki, onların yazıları axıcı, təsvirləri güclü idi. Bəzən ciddi arqumentlər gətirməsələr də, ədəbi cəhətdən yazıları yağ kimi oxunurdu və bu üslub onları daha maraqlı edirdi. ad çəkməyəcəm.

Bu yaşadığım təcrübə fikirlərimi dəyişdi məsələn
Mən də əvvəllər fərqli düşünürdüm. Dostoyevski, Qaraqan, Çingiz Abdullayev kimi yazıçıları oxuyanları ələ salır, onlara yuxarıdan aşağı baxırdım. Amma bunu edən zamanlarda evdən çölə çıxmayan biri idim.

Sonra cəmiyyət içinə qarışdım, insanların gündəlik danışıqlarına, ünsiyyət mexanizmlərinə fikir verdim. Onda öz-özümə "pay bunun içinə bəhməz!" dedim. Anladım ki, səhv düşünmüşəm. insanlar əvvəlcə ibtidai, yüngül, dayaz fikir məcmusu olan kitabları oxumalıdırlar. Əgər bunları oxumasalar, birbaşa ciddi kitablara gedib çıxa bilməyəcəklər.

Bunun təsdiqini bir daha ingilis dilini fərdi şəkildə öyrənməyə başlayanda anladım. O zamanlar ingilis dilində 10-20 vərəqlik nağıl kitabları var idi. Bu kitablar çətinliyə görə təsnifləndirilmişdi.
Beginner Stage 1 kitabları çox sadə qrammatikadan, qısa cümlələrdən və asan sözlərdən ibarət idi.
Daha sonra Stage 2 və daha çətin mərhələlərə keçirdi.

Eynilə, kitab oxuma vərdişi də belə inkişaf edir. Əgər bir insan sadə kitabları oxumadan birbaşa fəlsəfi və ya akademik əsərlərə keçməyə çalışsa, çox çətinlik çəkəcək və tezliklə oxumaqdan imtina edəcək.

2. Nitq qabiliyyətini gücləndirir
Müxtəlif janrlar və müəlliflər oxumaq insanın söz ehtiyatını artırır.
Natiqlik və təqdimat bacarıqları yaxşılaşır.
Fikirləri ardıcıl və axıcı şəkildə ifadə etməyə kömək edir.
Doğru vurğular, məntiqi ardıcıllıq və təsir gücü artır.

3. Düşünərkən arqument gətirmək bacarığını inkişaf etdirir
Müxtəlif fikir məktəblərini və fəlsəfi baxışları öyrənmək insana mövqe formalaşdırmağa kömək edir.
Mübahisələrdə və diskussiyalarda daha güclü arqumentlər irəli sürməyi öyrədir.
Faktlara əsaslanaraq emosional deyil, məntiqli çıxışlar etməyə yardımçı olur.

4. Qrammatik qaydaları və imla bacarığını inkişaf etdirir
Davamlı doğru yazılmış mətnləri oxumaq səhv yazım vərdişlərini aradan qaldırır.
istifadə edilən cümlə quruluşları və sintaktik qaydalar beynə həkk olunur.
Durğu işarələrinin düzgün istifadəsi instinktiv hala gəlir.
Bir örnək:
Şirkətimizin müdiri hər ay çoxlu pul qazanırdı. Amma di gəl ki, "-da, -də" ədatlarını cümlədə düzgün işlədə bilmirdi. Hətta bu adamın ali təhsili var idi. Buna görə ona həmişə lağ edirdim.

Bir müddətdən sonra bu "bullingə" dözə bilməyib 10-15 dənə biznes və motivasiya kitabı aldı. işçilər arasında mənim lağ obyektimə çevrilməsi onun nəinki qürurunu, hətta biznesini də təhdid edirdi.

ən sonda demək istəyirəm ki ən ali zirvə intellektuallığdır. Heç bir bahalı maşın və ya bahalı həyat, idman titulları, vəzifələr sizi o zirvəyə qaldıra bilməz.